BBC မြန်မာပိုင်း
ကြာသပတေးနေ့ ညနေပိုင်းအစီအစဉ်
၂၀၁၁ ခုနှစ်၊ သြဂုတ်လ ၁၈ ရက်။
ဦးအောင်မိုးဇော် - အခုလက်ရှိ အစိုးရကိုယ်၌က ရွေးကောက်ပွဲကတက်လာတဲ့ အစိုးရဆိုပြီးတော့ သူတို့ဘာသာသူတို့ Claim လုပ်နေရတယ်။ အဲဒီလို အခြေအနေအောက်မှာ အခုတက်လာမယ့်အစိုးရကို နိုင်ငံတကာက အသိအမှတ်ပြုတာ နောက် ပြည်တွင်းက အသိအမှတ်ပြုတာ၊ ဒီကိစ္စတွေကို အသည်းအသန်လိုချင်နေပုံရတယ်လို့ ကျနော့်အနေနဲ့ အဲဒီလို တွက်ပါတယ်။ အဲဒီအခြေအနေ အောက်မှာမှ ၂၀၀၈ ဖွဲ့စည်းအုပ်ချုပ်ပုံ အခြေခံဥပဒေကို မထိခိုက်ဘဲနဲ့ ဒေါ်အောင်ဆန်းစုကြည်နဲ့ စကားပြောဖို့ကို ကြိုးစားနေတယ်။ တိုင်းရင်းသားတွေနဲ့လည်း စစ်တိုက်လိုက် စကားပြောလိုက် လုပ်နေတယ်။
ဒီကြားထဲမှာ ဆင်းရဲမှုပပျောက်ရေးဆိုတဲ့ညီလာခံမှာ ဒေါ်အောင်ဆန်းစုကြည်ကို ဖိတ်မယ်တို့ စသည်ဖြင့် ဒါမျိုးတွေ ကျနော်တို့ကြားနေရတယ်။ အဲဒါတွေအားလုံးရဲ့ရည်ရွယ်ချက်က ဒီ ၂၀၀၈ အခြေခံဥပဒေဘောင်အတွင်းမှာ ဒီ အင်အားစုအသီးသီးက လာပြီးတော့အလုပ်အကျွေးပြုဖို့ဆိုတဲ့နည်းဗျူဟာကို ကြိုးစားနေတယ်လို့ ကျနော်တို့ပါတီအနေနဲ့ မြင်တယ်။ ဒါက တချက်။
တဆက်တည်းမှာပဲနော် ဒီမိုကရေစီပြုပြင်ပြောင်းလဲမှုကို ငြိမ်းငြိမ်းချမ်းချမ်း၊ တိုင်းပြည်ငြိမ်းချမ်းရေးအတွက်ကို စစ်စစ်မှန် မှန်တင်ပြနေတဲ့ အင်အားစုတွေ လူပုဂ္ဂိုလ်တွေကို တဖြည်းဖြည်းနဲ့ Marginalize ဖြစ်အောင်ကြိုးစားနေတဲ့ ခြေလှမ်းဖြစ်တယ်လို့ ကျနော်တို့ အဲဒီလိုမြင်ပါတယ်။
BBC - ဒီပြောဆိုမှုဟာ မြန်မာနိုင်ငံမှာ အမျိုးသားပြန်လည်သင့်မြတ်ရေးအတွက် ရိုးရိုးသားသားဖိတ်ခေါ်မှုလို့ သုံးသပ်ကြတဲ့သူတွေ ရှိနေပါတယ်။ အဲဒီတော့ ဦးအောင်မိုးဇော်တို့အနေနဲ့က သမ္မတကြီးရဲ့ အခုပြောဆိုမှုကို ရိုးရိုးသားသားဖိတ်ခေါ်မှုရယ်လို့ မမြင်ဘူးလား။
ဦးအောင်မိုးဇော် - ကျနော်တို့ မြင်ချင်ပါတယ်။ အဲဒီလိုမြင်နိုင်ဖို့အတွက်ဆိုလို့ရှိရင် တိုက်တွန်းချင်တာကတော့ ဒေါ်အောင်ဆန်းစုကြည်ကို လူထုခေါင်းဆောင်တဦး၊ အမျိုးသားဒီမိုကရေစီအဖွဲ့ချုပ်ရဲ့ ခေါင်းဆောင်တဦးအဖြစ် ပြည်သူကို ကိုယ်စားပြုနိုင်တဲ့ ပုဂ္ဂိုလ်တဦးအဖြစ်သဘောထားပြီးတော့ အခုစကားပြောနေတဲ့ဖြစ်စဉ်ကို မြန်မြန်ဆန်ဆန်ဆက်ပြီးတော့ တိုးတက်သွားအောင် လုပ်ပေးပါလို့ ကျနော့်အနေနဲ့ တိုက်တွန်းချင်တယ်။ အဲဒီစကားပြောဆိုမှုသာ အကယ်၍ အဆင်ပြေမယ်ဆိုလို့ရှိရင် သမ္မတကြီးရဲ့လုပ်ရပ်ပဲဖြစ်ဖြစ် ကနေ့ လက်ရှိအစိုးရသစ်ရဲ့လုပ်ရပ်ကိုပဲဖြစ်ဖြစ် ပြည်သူတွေ အကောင်းသဘောမြင်လာလိမ့်မယ်လို့ ကျနော့်အနေနဲ့ ထင်တယ်။ ဒါ ပထမ တချက်။
ဒုတိယ တချက်။ နိုင်ငံတကာမှာ ရောက်နေတဲ့ ပုဂ္ဂိုလ်တွေကို ကျော်ခေါ်တာထက်စာလို့ရှိရင် ဒီအကျဉ်းထောင်တွေထဲမှာ ကျနေတဲ့ နိုင်ငံရေးအကျဉ်းသားတွေ ရှိတယ်။ ကိုမင်းကိုနိုင်တို့လို ကိုကိုကြီးတို့လို ပုဂ္ဂိုလ်မျိုးတွေ။ ဒီပုဂ္ဂိုလ်တွေဟာ တိုင်းပြည်တိုး တက်ရေးအတွက်ကို အများကြီးအလုပ်အကျွေးပြုနိုင်မယ့် ပုဂ္ဂိုလ်တွေဖြစ်တယ်။ ဒီပုဂ္ဂိုလ်တွေကိုသာ လွှတ်ပေးလိုက်မယ်ဆိုလို့ရှိရင် ဒီ သမ္မတကြီးရဲ့ဖိတ်ခေါ်မှုကို ပြည်သူတွေကရော နိုင်ငံတကာကပါ အကောင်းသဘော ပိုပြီးတော့ မြင်လာလိမ့်မယ်လို့ ကျနော်တို့ အနေနဲ့မြင်ပါတယ်။
BBC - ဒါကတော့ ပြည်ပရောက် လူ့ဘောင်သစ်ဒီမိုကရက်တစ်ပါတီရဲ့ ဥက္ကဋ္ဌ ဦးအောင်မိုးဇော်ရဲ့အမြင်ပါ။
No comments:
Post a Comment