အမေရိကန်ပြည်ထောင်စု မြောက်ကာရိုလိုင်းနားပြည်နယ်၊ Chapel Hill မြို့မှာ ကျင်းပတဲ့ ရှစ်လေးလုံး အရေးတော်ပုံ ၂၃ နှစ်မြောက်နေ့ အခမ်းအနားကို လူ့ဘောင်သစ်ဒီမိုကရက်တစ် ပါတီဝင်များ တက်ရောက်ခဲ့ကြပါတယ်။
အဆိုပါ အခမ်းအနားကို မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ်တပ်ဦး ထောက်ပံ့ရေးအဖွဲ့က ဦးဆောင်ပြီး ၈၊ ၆၊ ၂၀၁၁ ရက်နေ့ ညနေ ၅ နာရီမှာ စတင်ကျင်းပပြုလုပ်ခဲ့တာ ဖြစ်ပါတယ်။
အခမ်းအနားသို့ လူ့ဘောင်သစ်ဒီမိုကရက်တစ် ပါတီဝင်များ၊ အမျိုးသားဒီမိုကရေစီအဖွဲ့ချုပ် အဖွဲ့ဝင်များ၊ ၁၉၉၀ ရွေးကောက်ခံ ပြည်သူ့လွှတ်တော် ကိုယ်စားလှယ်များ၊ ကျောင်းသားတပ်မတော်မှ ရဲဘော်ဟောင်းများ၊ ကရင့်အမျိုးသားအစည်းအရုံးမှ တာဝန်ရှိသူများ၊ မြန်မာ့ဒီမိုကရေစီအရေးကို စိတ်ပါဝင်စားသူများ စုစုပေါင်း ၁၀၀ ကျော် တက်ရောက်ခဲ့ကြပါတယ်။
အခမ်းအနားတွင် အလေးပြုခြင်း ၃ ရပ်ဖြင့်စတင်ခဲ့ပြီး အဖွဲ့အစည်းအသီးသီးမှပေးပို့တဲ့ သဝဏ်လွှာများအား ဖတ်ကြားခြင်း၊ တက်ရောက်လာတဲ့ လူကြီးမင်းများမှ အမှာစကားပြောကြားခြင်း၊ ရှစ်လေးလုံးတိုက်ပွဲတွင် ပါဝင်ခဲ့သူများမှ မိမိတို့အတွေ့အကြုံများအား ပြန်လည်ပြောကြားခြင်းနဲ့ ဖြစ်မြောက်ရေးကော်မီတီမှ ကျေးဇူးတင်စကားများပြောကြားခဲ့တယ်လို့ သိရပါတယ်။
အဲဒီနောက် ရှစ်လေးလုံး ကမ္ဘာမကြေ သီချင်းကို စုပေါင်းသီဆိုပြီး ညနေ ၈ နာရီမှာ အောင်မြင်စွာနဲ့ အခမ်းအနားကို ရုပ်သိမ်းခဲ့ကြောင်း သိရပါတယ်။
အမေရိကန်ပြည်ထောင်စု ပြည်နယ်အသီးသီးမှာရောက်ရှိနေတဲ့ လူ့ဘောင်သစ်ဒီမိုကရက်တစ်ပါတီဝင်များဟာ မိမိတို့ရောက်ရှိရာ ပြည်နယ်တွေမှာ ကျင်းပပြုလုပ်တဲ့ ရှစ်လေးလုံး အရေးတော်ပုံ ၂၃ နှစ်မြောက်နေ့ အခမ်းအနားတွေမှာ တက်ရောက်စကားပြောကြားခြင်း၊ သဝဏ်လွှာများပေးပို့ ဖတ်ကြားခြင်းများ ပြုလုပ်ခဲ့ကြကြောင်းလည်း သိရပါတယ်။
No comments:
Post a Comment