မြန်မာနိုင်ငံတွင် ပြည်ထောင်စု ဖွဲ့စည်းပုံအခြေခံဥပဒေဟူ၍ နိုင်ငံလွတ်လပ်ရေးရကတည်းက ယနေ့ထိ တခါမှ မပေါ်ပေါက်ခဲ့ဖူးသေးချေ။ ၁၉၄၇ ခုနှစ် အခြေခံဥပဒေသည်ပင်လျှင် ပြည်ထောင်စု ဥပဒေ မစစ်ခဲ့သေးပေ။ လွတ်လပ်ရေး အရယူနိုင်ရန် ပင်လုံစိတ်ဓာတ်ဖြင့် ရေးဆွဲခဲ့ရခြင်းဖြစ်သည်။
၎င်းကို ပြင်ဆင်ရန် (ဝါ) ပြည်ထောင်စု အခြေခံဥပဒေရေးဆွဲရန် ပြည်သူ့လွတ်တော် ပါလီမန် အစည်းအဝေးက ၁၉၆၀ ပြည့်နှစ် နိုဝင်ဘာ ၁၀ ရက်နေ့တွင် အဖွဲ့ဝင် ၂၉ ဦးပါသော အခြေခံဥပဒေပြင်ဆင်ရေးကော်မတီကို ဥပဒေအရ နိုင်ငံတော် သမ္မတက ဖွဲ့စည်းပေးခဲ့သည်။ အခြေခံဥပဒေပြင်ဆင်ရေးကော်မတီ၏ တာဝန် ၃ ရပ်ကိုလည်း ချမှတ်ပေးခဲ့သည်။
စုပေါင်းညှိနှိုင်းဆွေးနွေးပြီး ပြင်ဆင်ရန်ကြိုးပမ်းနေသည့်အချိန်ကာလမှာပင် ဗိုလ်နေဝင်း စစ်အုပ်စုက ၁၉၆၂ ခုနှစ်တွင် စစ်အာဏာသိမ်းကာ ပြည်ထောင်စုကို ဖျက်ဆီးခဲ့သည်။ ဗိုလ်နေဝင်း၏ ၁၉၇၄ ခုနှစ် မဆလ ပြည်ထောင်စု အခြေခံဥပဒေနှင့် ယခု ဗိုလ်သန်းရွှေ၏ ၂၀၀၈ ခုနှစ် နအဖ ပြည်ထောင်စုအခြေခံဥပဒေမှာလည်း အတူတူနှင့် အနူနူပင်ဖြစ်သည်။ အဘယ်ကြောင့်နည်း။ ဗိုလ်နေဝင်း၏ ၁၉၇၄ ခုနှစ် အခြေခံဥပဒေပုဒ်မ ၃၁ အရနှင့် ဗိုလ်သန်းရွှေ၏ ၂၀၀၈ ခုနှစ် အခြေခံဥပဒေပုဒ်မ ၄၉ အရ - တိုင်းဒေသကြီး ၇ ခုနှင့် ပြည်နယ် ၇ ခု ပိုင်းခြားသတ်မှတ်ချက်မှာ တထပ်တည်းတူနေကြ၍ ဖြစ်ပါသည်။ အားလုံး တပြည်ထောင်ဖွဲ့စည်းပုံ အခြေခံဥပဒေချည်း ဖြစ်နေသောကြောင့်ပင်တည်း။ မည်သည့် စစ်အာဏာရှင်စနစ်ကမျှ ပြည်ထောင်စုကို လုံးဝ မလိုလားကြောင်း တိုင်းရင်းသားအားလုံးက သိနှင့်နေကြပြီး ဖြစ်သည်။
၂၀၀၈ အခြေခံဥပဒေ ပုဒ်မ ၅၆ တွင် ကိုယ်ပိုင်အုပ်ချုပ်ခွင့်ရတိုင်းနှင့် ကိုယ်ပိုင်အုပ်ချုပ်ခွင့်ရဒေသများကို အောက်ပါအတိုင်း သတ်မှတ်သည်။
(က) စစ်ကိုင်းတိုင်းရှိ လေရှီးမြို့နယ်၊ လဟယ်မြို့နယ်နှင့် နန်းယွန်းမြို့နယ်တို့ကို စုစည်းပြီး နာဂ ကိုယ်ပိုင်အုပ်ချုပ်ခွင့်ရ ဒေသ၊
(ခ) ရှမ်းပြည်နယ်ရှိ ရွာငံမြို့နယ်နှင့် ပင်းတယမြို့နယ်တို့ကို စုစည်းပြီး ဓနု ကိုယ်ပိုင်အုပ်ချုပ်ခွင့်ရ ဒေသ၊
(ဂ) ရှမ်းပြည်နယ်ရှိ ဟိုပုန်းမြို့နယ်၊ ဆီဆိုင်မြို့နယ်နှင့် ပင်လောင်းမြို့နယ်တို့ကို စုစည်းပြီး ပအိုဝ်း ကိုယ်ပိုင်အုပ်ချုပ်ခွင့်ရ ဒေသ၊
(ဃ) ရှမ်းပြည်နယ်ရှိ နမ့်ဆန်မြို့နယ်နှင့် မန်တုံမြို့နယ်တို့ကို စုစည်းပြီး ပလောင် ကိုယ်ပိုင်အုပ်ချုပ်ခွင့်ရ ဒေသ၊
(င) ရှမ်းပြည်နယ်ရှိ ကုန်းကြမ်းမြို့နယ်နှင့် လောက်ကိုင်မြို့နယ်တို့ကို စုစည်းပြီး ကိုးကန့် ကိုယ်ပိုင်အုပ်ချုပ်ခွင့်ရ ဒေသ၊
(စ) ရှမ်းပြည်နယ်ရှိ ဟိုပန်မြို့နယ်၊ မိုင်းမောမြို့နယ်၊ ပန်ဝိုင်မြို့နယ်၊ နားဖန်းမြို့နယ်၊ မက်မန်းမြို့နယ်နှင့် ပန်ဆန်း (ပန်းခမ်း) မြို့နယ် ၆ မြို့နယ်တို့ကို ခရိုင် ၂ ခရိုင် ဖွဲ့ပြီး ‘ဝ’ ကိုယ်ပိုင်အုပ်ချုပ်ခွင့်ရ တိုင်း ဟု ဖော်ပြထားသည်။
တိုင်းဒေသကြီး လွှတ်တော် သို့မဟုတ် ပြည်နယ်လွှတ်တော် ဖွဲ့စည်းခြင်း။ ပုဒ်မ ၁၆၁ (ဃ) တွင် ပုဒ်မခွဲ (က) နှင့် (ခ) သို့မဟုတ် ပုဒ်မခွဲ (က) နှင့် (ဂ) တို့အရ ရွေးကောက်တင်မြှောက်သည့် လွှတ်တော်ကိုယ်စားလှယ် စုစုပေါင်း၏ သုံးပုံတပုံ နှင့်ညီမျှသော တပ်မတော် ကာကွယ်ရေးဦးစီးချုပ်က ဥပဒေနှင့်အညီ အမည်စာရင်းတင်သွင်းသည့် တပ်မတော်သား တိုင်းဒေသကြီး သို့မဟုတ် ပြည်နယ်လွှတ်တော်ကိုယ်စားလှယ်များ။ ဟု ဖော်ပြထားသည်။ စစ်တပ်မှ သုံးပုံ တပုံ (၂၅% ထက်များ) နေရာယူထားသည်။
တိုင်းဒေသကြီး သို့မဟုတ် ပြည်နယ် ဝန်ကြီးချုပ် ခန့်အပ်တာဝန်ပေးခြင်း ပုဒ်မ ၂၆၁ (ဃ) တွင် နိုင်ငံတော် သမ္မတက အမည်စာရင်းတင်သွင်းသည့် လွှတ်တော်ကိုယ်စားလှယ်အားတိုင်းဒေသကြီး သို့မဟုတ် ပြည်နယ် ဝန်ကြီးချုပ်အဖြစ် ခန့်အပ်တာဝန်ပေးရန် ငြင်းပယ်ခွင့်မရှိစေရ ဟုပြဋ္ဌာန်းထားသည်။ ၂၀၀၈ ဖွဲ့စည်းပုံ အခြေခံဥပဒေပုဒ်မ ၄၉ အရ တိုင်းဒေသကြီး ၇ ခုသတ်မှတ်ထားသဖြင့် ပုဒ်မ ၂၆၁ (ဃ) အရ တိုင်းဒေသကြီး ဝန်ကြီးချုပ် ၇ ဦးကို သမ္မတက ခန့်အပ်ထားပါသည်။ လက်ရှိသမ္မတ ဦးသိန်းစိန် က ယခုတလော ပြောဆိုဖွင့်ဟလာပါသည်။ ဗမာလည်း တိုင်းရင်းသားလူမျိုးတမျိုးဖြစ်သည်ကို ယခုမှ ဘာကြောင့်ပြောပါသလဲ။ လူမျိုးတမျိုး (ဝါ) ပြည်နယ်ဝန်ကြီးချုပ်တဦး ခန့်အပ်ထားသည့်ကာလတွင် ဗမာလူမျိုးတမျိုး (ဝါ) ဗမာပြည်နယ်ဖွဲ့စည်းပုံနှင့် ဗမာဝန်ကြီးချုပ်တစ်ဦးကိုသာ ခန့်ထားချင်၍လော။ သို့ဆိုပါလျှင် ဝန်ကြီးချုပ် ၆ ဦးနေရာနှင့် ဌာနအတွက် တိုင်းပြည်ကပေးနေရသည့် လစာငွေ သိန်းပေါင်းမြောက်များစွာ သက်သာသွားဖွယ်ရာရှိပါသည်။ ဆင်းရဲမွဲတေမှု ကျဆင်းအောင်လုပ်ရာလည်း ရောက်ပါမည်။ ဗမာပြည်နယ်ကို သမ္မတ ဦးသိန်းစိန် ဖွဲ့စည်းဝံ့ပါမည်လော။ လူမျိုးစုတိုင်း၏ တန်းတူရေးကို လက်တွေ့ အကောင်အထည် ဖော်ဝံ့ပါမည်လော။ ပြည်ထောင်စုစစ်စစ်ကို လိုလားလျှင်၊ နိုင်ငံ၏ ထာဝရ ငြိမ်းချမ်းရေးကို လိုလားလျှင် လက်တွေ့ လုပ်ရဲ ကိုင်ရဲ ရှိရပါမည်။ ဗမာအပါအဝင် တိုင်းရင်းသားလူမျိုးပေါင်းစုံက နိုင်ငံရေးအရ အာရုံစိုက်နေကြလေပြီ။
ဥပဒေပြုခွင့် အာဏာနှင့်ပတ်သက်၍ ပုဒ်မ ၁၉၆ တွင် ကိုယ်ပိုင်အုပ်ချုပ်ခွင့်ရတိုင်း သို့မဟုတ် ကိုယ်ပိုင်အုပ်ချုပ်ခွင့်ရဒေသ ဦးစီးအဖွဲ့များအား မိမိတို့ တိုင်း သို့မဟုတ် ဒေသအတွက် ဇယား ၃ တွင် ဖော်ပြထားသော ဥပဒေပြု စာရင်းပါ ကိစ္စရပ်များနှင့် စပ်လျဉ်းသည့် ဥပဒေပြုခွင့် အာဏာများကို ခွဲဝေအပ်နှင်းသည် ဟု ဖော်ပြသည်။ ဇယား ၃ တွင် ဥပဒေပြုစာရင်းကို အောက်ပါအတိုင်း တွေ့ရှိရသည်။
(၁) မြို့ပြနှင့် ကျေးရွာ စီမံကိန်းများ။
(၂) လမ်းတံတားများ ဖောက်လုပ်၊ တည်ဆောက်၊ ပြုပြင်ထိန်းသိမ်းရေး၊
(၃) ပြည်သူ့ ကျန်းမာရေး၊
(၄) စည်ပင်သာယာရေးလုပ်ငန်း၊
(၅) မီးဘေး အန္တရာယ် ကြိုတင်ကာကွယ်ရေး၊
(၆) စားကျက်မြေများ ထိန်းသိမ်းရေး၊
(၇) သစ်တောများ ကာကွယ်ထိန်းသိမ်းရေး၊
(၈) ပြည်ထောင်စုကပြဋ္ဌာန်းသည့် ဥပဒေနှင့်အညီ သဘာဝပတ်ဝန်းကျင် ထိန်းသိမ်းရေး။
(၉) မြို့နှင့် ကျေးရွာများအတွင်း ရေနှင့်လျှပ်စစ်မီးဆိုင်ရာကိစ္စ၊
(၁၀) မြို့များနှင့် ကျေးရွာများ၏ ဈေးများဆိုင်ရာကိစ္စ ဟု ဖော်ပြထားသည်။
အထက်ပါ ဥပဒေပြုစာရင်း ၁၀ ခုကိုသာလျှင် ကိုယ်ပိုင်အုပ်ခွင့်ရဒေသများဖြစ်သော နာဂ၊ ဓနု၊ ပအိုဝ်း၊ ပလောင်၊ ကိုးကန့်၊ ဝ လူမျိုးစုများ တင်ပြခွင့်ရမည်။ ဒေသဆိုင်ရာ ကိုယ်ပိုင်အုပ်ချုပ်ခွင့်မှာ အမျိုးသားလူမျိုးစု အခွင့်အရေးနှင့်ပတ်သက်၍ မည်သည့်ပြဋ္ဌာန်းချက်ကိုမှပြဋ္ဌာန်းရန် တင်ပြပိုင်ခွင့် မရှိပါ။ လူမျိုးစုများအား စစ်တပ်မှ သုံးပုံတပုံ ကိုယ်စားလှယ်များက အနီးကပ် ဖိနှိပ် ခွဲခြားအုပ်ချုပ်ရန်အတွက် သီးသန့်ပြဋ္ဌာန်းလာခြင်းဖြစ်ကြောင်း တွေ့ရှိရပါသည်။ ကိုးကန့် ကိုယ်ပိုင်အုပ်ချုပ်ခွင့်ရဒေသကို ဝင်ရောက်တိုက်ခိုက် သိမ်းပိုက်ခြင်းက သက်သေပြခဲ့ပြီး ဖြစ်သည်။
ဖွဲ့စည်းပုံအခြေခံဥပဒေတွင် ဥပဒေပြုရေးကဏ္ဍ အာဏာခွဲဝေရေးအပိုင်းနှင့်ပတ်သက်၍ အပစ်ရပ် လူမျိုးစု လက်နက်ကိုင် အဖွဲ့အစည်း ၁၃ ဖွဲ့ စုပေါင်းပြီး ညောင်နှစ်ပင်အမျိုးသားညီလာခံသို့ ၂၀၀၅ ခုနှစ်၊ ဖေဖော်ဝါရီ ၁၃ ရက်နေ့က တက်ရောက် တင်ပြခဲ့ကြသည်။ တင်ပြခဲ့သော အချက်များမှာ-
(၁) ထပ်တူ ဥပဒေပြုစာရင်း ထားရှိရေး၊
(၂) အကြွင်းအကျန် အာဏာကို ပြည်နယ်တွင် ထားရှိရေး၊
(၃) ဥပဒေပြုကဏ္ဍမှာ တိုင်းရင်းသားလူမျိုးစုကို သီးခြားထားရှိရေး၊
(၄) ပြည်နယ်လွှတ်တော်တွေမှာ လုံခြုံရေး၊ ကာကွယ်ရေးဆိုင်ရာ ဥပဒေပြုပိုင်ခွင့်ရှိရေး၊
(၅) ပြည်နယ်လွှတ်တော်တွေမှာ စာပေ၊ ယဉ်ကျေးမှုနှင့်ပတ်သက်ပြီး ဥပဒေပြုပိုင်ခွင့်ရှိရေး၊
(၆) တိုင်းရင်းသားတွေ့ရဲ့ ဓလေ့ထုံးတမ်း ဥပဒေတွေကို ပြည်နယ်တွေမှာ ဥပဒေပြု ပြဋ္ဌာန်းနိုင်ရေးနှင့်
(၇) ပြည်နယ် ဖွဲ့စည်းပုံအခြေခံဥပဒေ သီးခြားရေးဆွဲ ပြဋ္ဌာန်းကျင့်သုံးခွင့်ရှိရေး တို့ဖြစ်သည်။
လူမျိုးစု ခေါင်းဆောင်များ တရားဝင် တင်ပြချက်များအား တချက်ကိုမျှ လေးစားခြင်းမရှိဘဲ၊ ဥပဒေပြုစာရင်း ၁၀ ခုကိုသာ ဇယား ၃ ဖြင့် ၂၀၀၈ ဖွဲ့စည်းပုံအခြေခံဥပဒေ၌ ပြဋ္ဌာန်းလာသည်။ လူမျိုးစုနယ်မြေများကို ခွဲခြားလိုက်ရုံမျှဖြင့် လူမျိုးစုပြဿနာများ ပြေလည်သွားပြီဟု လက်ခံထားချက်မှာ အင်မတိ အင်မတန် မှားယွင်းချက် ဖြစ်ပါသည်။ မည်သည့် အမျိုးသား လူမျိုးစုကိုမျှ ကောင်းကျိုးမပေး၍ ဖြစ်ပါသည်။
အမျိုးသားဒေသ ကိုယ်ပိုင်အုပ်ချုပ်ရေး ဥပဒေများနှင့်စပ်လျဉ်းပြီး တပြည်ထောင်စနစ်ကို ကျင့်သုံးသည့် တရုတ်ပြည်သူ့သမ္မတနိုင်ငံ၏ အမျိုးသား ကိုယ်ပိုင်အုပ်ချုပ်ရေး ဥပဒေကို လေ့လာခြင်းအားဖြင့် နှိုင်းယှဉ်ကြည့်၍ ရနိုင်ပါသည်။ မြန်မာနိုင်ငံတွင် အလိမ်အညာ ပြည်ထောင်စု ဆိပ်ခေါင်းပြပြီး တပြည်ထောင် ခွေးသားရောင်းနေသော စစ်အာဏာရှင်များ၏ မျက်လှည့်ပြပွဲ သက်ဇိုးမရှည်နိုင်ရန် ဖော်ထုတ်ပြဖို့ လိုအပ်ပါသည်။
အမျိုးသား ကိုယ်ပိုင်အုပ်ချုပ်ရေးဥပဒေကို တရုတ်ပြည်သူ့သမ္မတနိုင်ငံ ဆဌမအကြိမ်မြောက် ပြည့်သူ့ကွန်ဂရက်၊ ဒုတိယအကြိမ် အစည်းအဝေးက ၁၉၈၄ ခုနှစ်၊ မေလ ၃၁ ရက်နေ့တွင် အတည်ပြု ပြဋ္ဌာန်းခဲ့သည်။ သမ္မတ၏ အမိန့်အမှတ် ၁၃ အရ ထုတ်ပြန်ကြေညာ၍ ၁၉၈၄ ခုနှစ်၊ အောက်တိုဘာ ၁ ရက်နေ့မှစတင် ကျင့်သုံးခဲ့ပါသည်။ ဥပဒေပါ ပုဒ်မ အချို့ကို တင်ပြပါသည်။
ဥပဒေ၏ နိဒါန်းတွင် – “အမျိုးသားအသီးသီး တန်းတူညီမျှမှု၊ စည်းလုံးညီညွတ်မှုနှင့် အတူတကွ တိုးတက်ကြီးပွားစေရေးမူအရ လိုက်နာကျင့်သုံးရာ၌လည်းကောင်း၊ လူနည်းစု အမျိုးသားများ၏ အခွင့်အရေးကို နိုင်ငံတော်၏ အပြည့်အဝ အလေးထားမှုနှင့် အာမခံမှုကို ဒေသဆိုင်ရာ အမျိုးသား ကိုယ်ပိုင်အုပ်ချုပ်ရေးက ဖော်ဆောင်သည်။”
“အမျိုးသား သွေးစည်းရေးကို ထိန်းသိမ်းထားရှိရန်ကြိုးပမ်းရာတွင် လူမျိုးကြီးဝါဒ အဓိကအားဖြင့် ဟန်လူမျိုးကြီးဝါဒကို ဆန့်ကျင်တိုက်ခိုက်သွားရမည်။ တချိန်တည်းတွင် ဒေသန္တရလူမျိုးရေးဝါဒကိုလည်း ဆန့်ကျင်တိုက်ခိုက်သွားရမည်။”
“အမျိုးသားအသီးသီး အတူတကွ ဖွံ့ဖြိုးတိုးတက်ရေး၊ သွေးစည်းညီညွတ်ရေးနှင့် စည်ပင်ဝပြောရေးအတွက် လုပ်ဆောင်ရမည်။” ဟု ဖော်ပြထားသည်။
ပုဒ်မ (၁)။ ။ တရုတ်ပြည်သူ့သမ္မတနိုင်ငံတော်၏ ဒေသဆိုင်ရာ အမျိုးသား ကိုယ်ပိုင်အုပ်ချုပ်ရေး ဥပဒေသည် တရုတ်ပြည်သူ့သမ္မတနိုင်ငံတော် ဖွဲ့စည်းအုပ်ချုပ်ပုံ အခြေခံဥပဒေအရ ချမှတ်ပြဋ္ဌာန်းထားသော ဥပဒေဖြစ်သည်။
ပုဒ်မ (၉)။ ။ နိုင်ငံတော်၏အထက်အဆင့် အစိုးရအဖွဲ့အစည်းများနှင့် အမျိုးသား ကိုယ်ပိုင်အုပ်ချုပ်ရေးဒေသများရှိ အမျိုးသား ကိုယ်ပိုင်အုပ်ချုပ်ရေး အစိုးရအဖွဲ့အစည်းများသည် တရုတ်ပြည်၏ အမျိုးသားအားလုံး တန်းတူရေး၊ သွေးစည်းရေး၊ အပြန်အလှန် ကူညီရေးဟူသည့် ဆိုရှယ်လစ်ဆက်ဆံရေးစနစ်ကို ထိန်းသိမ်းစောင့်ရှောက်၍ ဖွံ့ဖြိုးတိုးတက်စေရမည်။
မည်သည့်အမျိုးသားကိုမဆို လူမျိုးခွဲခြားမှုနှင့် ဖိနှိပ်မှုကို ပိတ်ပင်ထားမြစ်ရမည်။ အမျိုးသားသွေးစည်းညီညွတ်ရေးကို ဖြိုခွဲသည့် သို့မဟုတ် အမျိုးသားသွေးကွဲရေးကို လှုံ့ဆော်သည့် မည်သည့်လုပ်ရပ်ကိုမဆို ပိတ်ပင်တားမြစ်ရမည်။
ပုဒ်မ (၁၀)။ ။ အမျိုးသားကိုယ်ပိုင်အုပ်ချုပ်ရေး ဒေသများ၏ ကိုယ်ပိုင်အုပ်ချုပ်ရေး အစိုးရအဖွဲ့အစည်းများသည် ၎င်းဒေသရှိ အမျိုးသားများ၏ ကိုယ်ပိုင်ဘာသာစကားကို လွတ်လပ်စွာ ရေးသား ပြောဆို အသုံးပြုမှု ဖွံ့ဖြိုးတိုးတက်စေရန် အာမခံရမည်။ မိမိတို့၏ ကိုယ်ပိုင်ရိုးရာ ဓလေ့ထုံးတမ်းများနှင့် အစဉ်အလာ အမှုအကျင့်များကို လွတ်လပ်စွာ ထိန်းသိမ်းခွင့်နှင့် ပြုပြင်ပြောင်းလဲခွင့်ရှိရေးကိုလည်း အာမခံရမည်။
ပုဒ်မ (၁၈)။ ။ အမျိုးသားကိုယ်ပိုင်အုပ်ချုပ်ရေး ဒေသတခု၏ ကိုယ်ပိုင်အုပ်ချုပ်ရေး အစိုးရအဖွဲ့အစည်းအောက်ရှိ ဌာနများမှ ကေဒါများကို ဖြစ်နိုင်သမျှ ၎င်းဒေသရှိ ကိုယ်ပိုင်အုပ်ချုပ်ရေးကျင့်သုံးနေသော နိုင်ငံသား လူမျိုးစုများနှင့် အခြား လူနည်းစုအမျိုးသားထဲမှ ရွေးချယ်ခန့်အပ်ရမည်။
ပုဒ်မ (၂၄)။ ။ အမျိုးသား ကိုယ်ပိုင်အုပ်ချုပ်ရေးဒေသများ၏ ကိုယ်ပိုင်အုပ်ချုပ်ရေးအစိုးရ အဖွဲ့အစည်းများသည် နိုင်ငံတော်၏ စစ်ဘက်ရေးရာစနစ်များနှင့် ဒေသ၏ လက်တွေ့လိုအပ်ချက်အရ နိုင်ငံတော်ကောင်စီ၏ အတည်ပြုချက်ကို ရယူပြီး အများပြည်သူ ငြိမ်ဝပ်ပိပြားရေး ထိန်းသိမ်းစောင့်ရှောက်ရန်အတွက် ဒေသန္တရ ပြည်သူ့လုံခြုံရေးတပ်ဖွဲ့များကို ဖွဲ့စည်းနိုင်သည်။
ပုဒ်မ (၃၀) ။ ။ အမျိုးသား ကိုယ်ပိုင်အုပ်ချုပ်ရေးနယ်မြေများ၏ ရငွေနှင့် သုံးငွေများကို ၎င်းနယ်မြေများအား အထူးအခွင့်အရေးပေးမှု မူအရ နိုင်ငံတော်ကောင်စီက တိတိကျကျ သတ်မှတ်ပေးရမည်။
ပုဒ်မ (၃၃) ။ ။ အမျိုးသား ကိုယ်ပိုင်အုပ်ချုပ်ရေးနယ်မြေများ၏ ရငွေနှင့် သုံးငွေများကို ၎င်းနယ်မြေများအား အထူးအခွင့်အရေးပေးမှု မူအရ နိုင်ငံတော်ကောင်စီက တိတိကျကျ သတ်မှတ်ပေးမည်။
အမျိုးသားကိုယ်ပိုင်အုပ်ချုပ်ရေး နယ်မြေတခုသည် နိုင်ငံတော်၏ စည်းကမ်းသတ်မှတ်ချက်များနှင့်အညီ မိမိ၏ ဘတ်ဂျက်ထဲမှ အသုံးစရိတ်ငွေအတွက် အရံ ရန်ပုံငွေ ဖယ်ထားရမည်။ ၎င်းဘတ်ဂျက်ထဲမှ အရံ ရန်ပုံငွေ အချိုးအစားသည် တခြားဒေသ၏ ဘတ်ဂျက်များထဲမှ အရံရန်ပုံငွေ အချိုးအစားထက် ပိုမြှင့်၍ ပေးရမည်။
ပုဒ်မ (၃၇)။ ။ လူနည်းစု အမျိုးသား ကျောင်းသား အများဆုံးရှိသည့်ကျောင်းများတွင် ဖြစ်နိုင်သမျှ အခါတိုင်း၊ ၎င်းတို့၏ မိခင် ဘာသာစကားသုံး ကျောင်းသင်ခန်းစာအုပ်များကို အသုံးပြုသင့်သည်။ သင်ကြားရေး ကြားခံအဖြစ်လည်း ဤဘာသာစကားကို သုံးစွဲစေသင့်သည်။ တရုတ် (ဟန်ဘာသာစကား) သင်တန်းများကို မူလတန်း အတန်းကြီးများ သို့မဟုတ် အထက်တန်းများအတွက် ပေကျင်း အသံထွက်ပေါ်တွင် အခြေခံထားသည့် အများသုံးစကား ဖူထုံးဝှါ ပျံ့နှံ့စေရန် သင်ကြားပေးရမည်။
ပုဒ်မ (၄၉) ။ ။ အမျိုးသား ကိုယ်ပိုင်အုပ်ချုပ်ရေးနယ်မြေများရှိ နိုင်ငံ့ဝန်ထမ်းများကို ဒေသအတွင်း အများသုံး အပြော သို့မဟုတ် အရေး ဘာသာစကားနှစ်မျိုး သို့မဟုတ် နှစ်မျိုးထက် ပိုမို၍ ကျွမ်းကျင်တတ်မြောက်ပါက ဆုချီးမြှင့် ပေးအပ်ရမည်။
ပုဒ်မ (၆၅) ။ ။ နိုင်ငံတော်က လူမျိုးစု တက္ကသိုလ်များကို ထူထောင်ရမည်။ အခြား အဆင့်မြင့်ပညာရေး တက္ကသိုလ်များတွင်လည်း လူနည်းစု အမျိုးသားကျောင်းသားများကိုသာ လက်ခံသော၊ လူမျိုးစု အဓိကထားသော သင်တန်းများနှင့် ကျောင်းဝင်ခွင့် အကြိုသင်တန်းများကို တည်ထောင်ပေးရမည်။
ဦးစားပေး ကျောင်းဝင်ခွင့်နှင့် ဦးစားပေး အလုပ်ခန့်အပ်ခြင်း စနစ်များကိုလည်း ချမှတ်နိုင်သည်။ ကျောင်းဝင်လက်ခံရာတွင် အဆင့်မြင့် ပညာရေး တက္ကသိုလ်များနှင့် စက်မှုအထက်တန်းကျောင်းများက လူနည်းစု အမျိုးသား ကျောင်းသားများအတွက် ကျောင်းဝင်ခွင့် စံနှုန်းနှင့် အရည်အချင်း သတ်မှတ်ချက်တို့ကို သင့်တော်စွာ နှိမ့်ချပေးရမည်။
- ဟူ၍ ပြဌာန်းထားချက်များကို တွေ့ရှိရပါသည်။
တခြားနိုင်ငံ၏ ဖွဲ့စည်းအုပ်ချုပ်ပုံစနစ်၌ တပြည်ထောင်စနစ်တွင်ပင်လျှင် အထက်ပါအခွင့်အရေးများကို လူမျိုးစုများအတွက် ပေးအပ် ပြဌာန်းထားသည်ကို တွေ့ရပါသည်။ ပြည်ထောင်စုစနစ်ကိုသွားမည့် မြန်မာနိုင်ငံအနေဖြင့်ဆိုပါမူ ထိုထက်ပင် ပိုမိုပြည့်စုံရန် လိုအပ်မည် ဖြစ်ပါသည်။
ယခုမြန်မာနိုင်ငံ၏ ၂၀၀၈ ဖွဲ့စည်းပုံအခြေခံဥပေဒေတွင် ‘ကိုယ်ပိုင်အုပ်ချုပ်ခွင့်ရ တိုင်းနှင့်ဒေသများ’ အတွက် အမျိုးသားကိုယ်ပိုင်အုပ်ချုပ်ခွင့် အခွင့်အရေးလောက်ကိုပင်လျှင် ဘာတစ်ခုမှ ပေးအပ် ပြဌာန်းထားခြင်းမရှိသည်ကို အပွင့်လင်းဆုံး တွေ့မြင်နေရပါသည်။ တိုင်းရင်းသားလူမျိုးပေါင်းစုံ ပြည်သူများ နှိုင်းယှဉ် လေ့လာနိုင်ပါရန် တင်ပြခြင်းသာဖြစ်ပါသည်။ နိုင်ငံလွတ်လပ်ရေးကို အရယူနိုင်ခဲ့သော လူမျိုးပေါင်းစုံ ပြည်သူများအနေဖြင့် လွတ်လပ်ရေးနှင့်အတူ တောင်းဆိုခဲ့သည့် ကိုယ့်ကြမ္မာ ကိုယ်ဖန်းတီးခွင့် ၊ ကိုယ်ပိုင်ပြဌာန်းခွင့် အခွင့်အရေး လုံးဝ (လုံးဝ) ပျောက်ဆုံးနေပါသည်။ ဝေးသော – သာ၍ဝေး သော – ဟိုတစ်ဖက်ကမ်းမှာ – ဟုသာ ထင်မှတ်ရပါတော့မည်။ နိုးနိုးကြားကြားရှိရန် လိုပါသည်။
ဦးမျိုး (ဥပဒေ)
၂၅. ၃. ၂၀၁၂
No comments:
Post a Comment