အားလုံးကို မင်္ဂလာပါလို့ နှုတ်ခွန်းဆက်ပါတယ်။ ကျနော်တို့ပါတီရဲ့ ၂၃ နှစ်ပြည့် အခမ်းအနားကို အခုလို ကျနော်တို့ ရဲဘော်တွေ၊ ကျနော်တို့ ညီအစ်ကိုမောင်နှမတွေ၊ မဟာမိတ်တွေနဲ့ စုံစုံညီညီကျင်းပခွင့်ရတဲ့အတွက် အများကြီးဝမ်းသာမိပါတယ်။ တပြိုင်နက်တည်းမှာပဲ အကျဉ်းထောင်တွေထဲမှာလည်း ကျနော်တို့ရဲဘော်တွေ ရှိနေကြသေးတယ်။ ကျနော်တို့ပါတီရဲ့ ၂၃ နှစ်ပြည့်အခမ်းအနားကို အကျဉ်းထောင်တွေထဲမှာလည်း လုပ်နေကြလိမ့်မယ်လို့ ကျနော်တော့ ယုံကြည်တယ်။ လုပ်လည်းလုပ်နေမှာ ဖြစ်ပါတယ်။
အားလုံးသိတဲ့အတိုင်းပဲ မနေ့ကတော့ အကျဉ်းသားတွေလွှတ်တာနဲ့အတူ နိုင်ငံရေးအကျဉ်းသားအချို့ကို ရောပြီး လွှတ်ခဲ့တာရှိပါတယ်။ သို့သော်လည်း ကျနော်တို့ပါတီက ခေါင်းဆောင်တွေ၊ ကျနော်တို့ပါတီက ရဲဘော်တွေ၊ တပြိုင်နက်တည်းမှာ ကျနော်တို့ညီအစ်ကိုမောင်နှမတွေဖြစ်တဲ့ ရှစ်လေးလုံးမျိုးဆက် ကျောင်းသားခေါင်းဆောင်တွေ လွတ်လာတာကို ကျနော်တို့ မတွေ့ခဲ့ရဘူး။ ဒီရဲဘော်တွေဟာ ကနေ့အခြေအနေအထိ အကျဉ်းထောင်တွေထဲမှာ လွတ်မြောက်ရေးအတွက် ဒီမိုကရေစီရေးအတွက် ကြံ့ကြံ့ခံ ဆက်လက်ရပ်တည်နေတုန်းပဲဖြစ်ပါတယ်။
ဒီနေ့ ဒီကာလမှာ အကျဉ်းထောင်အသီးသီးမှာရှိတဲ့ ကျနော်တို့ရဲဘော်တွေနဲ့ ၂၃ နှစ်တာ တိုက်ပွဲစဉ်အတွင်းမှာ ကျဆုံးခဲ့ရတဲ့ ကျနော်တို့ရဲဘော်တွေ၊ ကျနော်တို့ ညီအစ်ကိုမောင်နှမတွေ၊ ကနေ့အထိ အကျဉ်းထောင်တွေထဲမှာပဲဖြစ်ဖြစ် တောထဲ တောင်ထဲမှာဖြစ်ဖြစ် နိုင်ငံတကာမှာပဲဖြစ်ဖြစ်၊ နယ်စပ်ဒေသတွေမှာပဲဖြစ်ဖြစ် ဒီမိုကရေစီရေးတိုက်ပွဲကို ကြံ့ကြံ့ခံပြီးတော့ ဆက်လက်ရပ်တည် တိုက်ပွဲဝင်နေတဲ့ ရဲဘော်အားလုံးကို ကျနော်တို့ပါတီရဲ့ကိုယ်စား ဦးညွှတ်အလေးပြုတယ်လို့ ကျနော် ပထမဦးဆုံး ပြောချင်ပါတယ်။
တပြိုင်နက်တည်းမှာပြောချင်တာကတော့ ဒီကနေ့ကာလ ကျနော်တို့တိုင်းပြည်မှာ အပြောင်းအလဲတွေဖြစ်နေပြီဆိုတဲ့ အသံတွေ တော်တော်ညံနေပါတယ်။ ဒီ အုပ်ချုပ်တဲ့ပုဂ္ဂိုလ်တွေကလည်းပဲ အဲဒီလို အပြောင်းအလဲတွေဖြစ်နေပြီဆိုတဲ့ အသံတွေ ညံနိုင်တဲ့အနေအထားတချို့ကို ဆောငရရွက်နေတာတွေ့ရတယ်။ အဲဒီအတွက်လည်း အပြောင်းအလဲတွေ မြန်နေပြီဆိုတဲ့ အသံတွေက တော်တော်လေးကို ကျယ်ကျယ်လောင်လောင်ဖြစ်နေတာ တွေ့ရပါတယ်။ သို့သော်လည်းပဲ ဒီ အခြေခံကျကျ၊ ကျနော်တို့တိုင်းပြည်မှာ ဘာတွေပြောင်းလဲနေသလဲ၊ ကျနော်တို့တိုင်းပြည်မှာ ဘာတွေဖြစ်နေပြီလဲ၊ ကျနော်တို့ သေသေချာချာကြည့်မယ်ဆိုရင်တော့ ကနေ့အနေအထားအထိ ကျနော်တို့တိုင်းပြည်မှာ ဘာအပြောင်းအလဲမှ မယ်မယ်ရရ ဆုပ်ဆုပ်ကိုင်ကိုင် မပြနိုင်တာက ကနေ့ အခြေ အနေအထိဖြစ်နေပါတယ်။ ကျနော်တို့ အဓိက ပြောချင်တာကတော့ ဒီနေ့ကာလ ကျနော်တို့တိုင်းပြည်ဟာ ဆင်းရဲတွင်းကထွက်ဖို့၊ ကျနော်တို့တိုင်းပြည် လူ့အခွင့်အရေးချိုးဖောက်မှုတွေက လွန်မြောက်ဖို့၊ နိုင်ငံတကာမှာ အင်မတန်ကျဆင်းနေတဲ့ တိုင်းပြည်ရဲ့ ဂုဏ်သိက္ခာကို ပြန်လည် အဖတ်ဆည်နိုင်ဖို့ဆိုလို့ရှိရင် ကျနော်တို့တိုင်းပြည်ဟာ ဒီမိုကရေစီရေးလမ်းကြောင်းပေါ်ကို မြန်မြန်ရောက်ဖို့ လိုတယ်။ ကျနော်တို့တိုင်းပြည်ဟာ အမျိုးသားပြန်လည်သင့်မြတ်ရေးလမ်းကြောင်းပေါ်ကို မြန်မြန်ရောက်ဖုိ့လိုတယ်။ ကျနော်တို့ တိုင်းပြည်ဟာ စစ်အာဏာရှစ်စနစ်ကို မြန်မြန်ဖယ်ရှားနိုင်ဖို့လိုတယ်လို့ ကျနော်တို့ပါတီအနေနဲ့ ကနေ့ကာလမှာ ယူဆပါတယ်။
သို့သော်လည်း အခြေအနေတွေ အပြောင်းအလဲတွေ ဘယ်လောက်ဖြစ်နေပြီလို့ အသံတွေညံနေပေမယ့် ဒီမိုကရေစီရေး လမ်းကြောင်းပေါ်ကိုရောက်နိုင်တဲ့အနေအထား၊ အမျိုးသားပြန်လည်သင့်မြတ်ရေးလမ်းကြောင်းပေါ်ကို ရောက်နိုင်တဲ့ အနေအထား၊ စစ်အာဏာရှင်စနစ်ကို ဖယ်ရှားပြီးတော့ အရပ်သားအစိုးရ၊ ဒီမိုကရေစီအစိုးရတခုအနေနဲ့ အုပ်ချုပ်ရေး ယန္တရားတခုကို တည်ဆောက်နိုင်မယ့် အနေအထားတွေဟာ ကနေ့အခြေအနေအထိတော့ ဝေးကွာနေသေးတယ်ဆိုတာ အခုဖြစ်ပေါ်ပြောင်းလဲနေတဲ့ အချက်အလက်တွေကို ကြည့်မယ်ဆိုရင် သေသေချာချာ သိနိုင်ပါတယ်။
အထူးသဖြင့်တော့ ကျနော်တို့ပါတီရဲ့ ၂၃ နှစ်ပြည့် အခမ်းအနားမှာ ပါတီရဲ့သဘောထားတခုကို ဒီပါတီရဲ့ကိုယ်စား တင်ပြချင်ပါတယ်။ ကနေ့ ကျနော်တို့တိုင်းပြည်ရဲ့အပြောင်းအလဲတွေကို အမှန်တကယ်ဆောင်ကျဉ်းနိုင်ဖို့ဆိုလို့ရှိရင် ရှေ့မှာ ရှိနေတဲ့ ခလုတ်ကန်သင်း၊ ဒီအပြောင်းအလဲတွေကို သွားတဲ့နေရာမှာ ကြုံတွေ့နေရတဲ့ ခလုတ်ကန်သင်းကို ကျနော်တို့ ရှင်းနိုင်မှ ရလိမ့်မယ်။ အဲဒီခလုတ်ကန်သင်းဟာ တကယ်တမ်းကျတော့ ကျနော်တို့တိုင်းပြည်ကို စစ်အုပ်စုက တရားဝင်အုပ်ချုပ်ဖို့အတွက် အခွင့်အရေးပေးထားတဲ့ ၂၀၀၈ ဖွဲ့စည်းအုပ်ချုပ်ပုံအခြေခံဥပဒေပဲ ဖြစ်ပါတယ်။ ၂၀၀၈ ဖွဲ့စည်းအုပ်ချုပ်ပုံအခြေခံဥပဒေကို ကျနော်တို့ မပြင်နိုင်ဘူး၊ ၂၀၀၈ ဖွဲ့စည်းအုပ်ချုပ်ပုံအခြေခံဥပဒေကို ကျနော်တို့ မဖယ်ရှားနိုင်ဘူး၊ ၂၀၀၈ ဖွဲ့စည်းအုပ်ချုပ်ပုံအခြေခံဥပဒေကို ဆွဲစုတ်မပစ်နိုင်ဘူးဆိုလို့ရှိရင် ကျနော်တို့တိုင်းပြည်ရဲ့ အနေအထား၊ ကျနော်တို့ရဲ့အနေအထားဟာ တကယ်တမ်းပြောမယ်ဆိုလို့ရှိရင် ဒီမိုကရေစီရေး လမ်းကြောင်းပေါ်ကို ရောက်ဖို့ အတော်ခက်လိမ့်မယ်လို့ ကျနော့်အနေနဲ့ ဒီနေရာမှာ လေးလေးနက်နက် ပြောချင်ပါတယ်။ ၂၀၀၈ ဖွဲ့စည်းအုပ်ချုပ်ပုံအခြေခံဥပဒေဟာ ကျနော်တို့သွားမယ့် ခရီးလမ်းတလျှောက်မှာ ရှေ့ကခံနေတဲ့ ခလုတ်ကန်သင်းပဲ ဖြစ်ပါတယ်။ ဒီ ၂၀၀၈ ဖွဲ့စည်းအုပ်ချုပ်ပုံအခြေခံဥပဒေကို ပြုနိုင် ပြင်နိုင်ဖို့၊ ၂၀၀၈ ဖွဲ့စည်းအုပ်ချုပ်ပုံအခြေခံဥပဒေကို ဖယ်ရှားနိုင်ဖို့အတွက် ဒီမိုကရေစီရေးတိုက်ပွဲဝင်နေတဲ့ အင်အားစုတွေ၊ အမျိုးသားရေးလက်နက်ကိုင်အင်အားစုတွေ၊ ကျနော်တို့တတွေ တတ်နိုင်သမျှ နည်းလမ်းပေါင်းစုံနဲ့တော့ ကြိုးစားနေကြတယ်။
ဒီနေရာမှာ ထူးထူးခြားခြား ကျနော်တို့ရဲ့ လူထုခေါင်းဆောင် ဒေါ်အောင်ဆန်းစုကြည်အနေနဲ့လည်းပဲ ကနေ့ ၂၀၀၈ ဖွဲ့စည်းအုပ်ချုပ်ပုံအခြေခံဥပဒေကို ပြုနိုင် ပြင်နိုင်ဖို့၊ ၂၀၀၈ ဖွဲ့စည်းအုပ်ချုပ်ပုံအခြေခံဥပဒေကို ဖယ်ရှားပြီးတော့ တိုင်းပြည်ကို ဒီမိုကရေစီရေးလမ်းကြောင်းပေါ်ကို ရောက်အောင်လို့၊ တိုင်းပြည်ကို အမျိုးသားပြန်လည်သင့်မြတ်ရေးလမ်းကြောင်းပေါ်ကို ရောက်အောင်လို့ ကြိုးစားဆောင်ရွက်နေမှုတွေရှိပါတယ်။ အားလုံးလည်းသိတဲ့အတိုင်းပဲ ကြိုးစားဆောင်ရွက်နေမှုတွေ ရှိပါတယ်။ ဒီလို ကြိုးစား ဆောင်ရွက်မှုတွေကို ကျနော်တို့အနေနဲ့ လေးလေးနက်နက် ထောက်ခံတယ်ဆိုတာ ပြောချင်ပါတယ်။ ဒီလို ထောက်ခံရင်းနဲ့ တပြိုင်နက်တည်းမှာလည်းပဲ ကျနော်တို့အနေနဲ့ သက်ဆိုင်တဲ့ပုဂ္ဂိုလ်တွေကို ထပ်ပြီးတော့ ပြောချင်တာကတော့ ဒီ ၂၀၀၈ ဖွဲ့စည်းအုပ်ချုပ်ပုံ အခြေခံဥပဒေဟာ ပြင်ကို ပြင်မှ ရလိမ့်မယ်။ ၂၀၀၈ ဖွဲ့စည်းအုပ်ချုပ်ပုံအခြေခံဥပဒေကို ဖယ်ကို ဖယ်ရှားနိုင်မှ ဖြစ်လိမ့်မယ်။ ကျနော် တို့ ဒီအပေါ်မှာ အမြဲတမ်း သတိချပ်တယ်ဆိုတာကို လေးလေးနက်နက် ပြောချင်ပါတယ်။
အခုအခြေအနေက ကျနော်တို့ရဲ့ ၂၃ နှစ်မြောက် ကြေညာချက်ထဲမှာ ဖော်ပြထားသလိုပဲ။ ကနေ့ ကျနော်တို့ရဲ့ လူထု ခေါင်းဆောင် ဒေါ်အောင်ဆန်းစုကြည်က ကျနော်တို့တိုင်းပြည်ကို၊ ဒီမိုကရေစီရေးလမ်းကြောင်းပေါ်ကို ရောက်အောင်လို့ တွန်းပို့ကောင်း တွန်းပို့နိုင်တယ်။ ဒီမိုကရေစီရေး လမ်းကြောင်းပေါ်ကိုရောက်အောင်လို့ ဆွဲခေါ်ကောင်း ဆွဲခေါ်သွားနိုင်တယ်။ တပြိုင်နက်တည်းမှာလည်းပဲ ခုနက ကျနော်ပြောခဲ့သလို ကနေ့ကာလ နိုင်ငံရေး ဖြစ်ပေါ်တိုးတက်မှုတွေကို ကြည့်မယ်ဆိုလို့ရှိရင် ဘာမှ မယ်မယ်ရရ ပြောင်းလဲနေတဲ့ အချက်အလက်ကို ကျနော်တို့ မတွေ့ရသေးဘူး။ အဲဒီအတွက် ဒေါ်အောင်ဆန်းစုကြည်ရဲ့ ကြိုးစားဆောင်ရွက်မှုတွေပဲဖြစ်ဖြစ်၊ ကနေ့ တွေ့ဆုံဆွေးနွေးမှုတွေပဲဖြစ်ဖြစ် အချိန်မရွေး ရပ်တန့်သွားနိုင်တယ်။ ကျနော်တို့တိုင်းပြည်ဟာ အဆိုးသံသရာဘက်ကို ပြန်ပြီးတော့ လည်သွားနိုင်တယ်။ ပြန်ပြီး လည်သွားနိုင်တယ်ဆိုလို့ အခု အကောင်းဘက်ကို ရောက်နေပြီလားလို့ မေးလို့ရှိရင်လည်းပဲ အကောင်းကို ရောက်နေပြီလို့ ပြောဖို့ခက်ပါတယ်။ ကျနော်တို့ခေါင်းဆောင်အပေါ်မှာ ကျနော်တို့ရဲ့ ယုံကြည်မှု၊ ကျနော်တို့ခေါင်းဆောင်အပေါ်မှာ ကျနော်တို့ရဲ့ ထောက်ခံမှုနဲ့သာ ကနေ့ တွေ့ဆုံဆွေးနွေးမှုဖြစ်စဉ်ဟာ တစုံတရာအားဖြင့် တိုင်းပြည်ကို ဒီမိုကရေစီရေးလမ်းကြောင်းပေါ်ကို ရောက်သွားနိုင်တယ်လို့ ကျနော်တို့ပြောနေတာ ဖြစ်ပါတယ်။ လက်တွေ့အားဖြင့်တော့ ဒီမိုကရေစီ ရေးလမ်ကြောင်းပေါ်ကိုရောက်နိုင်တဲ့ ခိုင်မာတဲ့ အချက်အလက် ကျနော်တို့ မတွေ့ရသေးပါဘူးဆိုတာကိုလည်း ပြောချင်ပါတယ်။
ဒီကနေ့ ၂၃ နှစ်မြောက် မွေးနေ့အခမ်းအနားမှာ ကျနော်တို့ပါတီအနေနဲ့ အဓိကပြောချင်တာကတော့ ၂၀၀၈ ဖွဲ့စည်းအုပ်ချုပ်ပုံ အခြေခံဥပဒေကို ကျနော်တို့ မဖယ်ရှားနိုင်၊ ၂၀၀၈ ဖွဲ့စည်းအုပ်ချုပ်ပုံအခြေခံဥပဒေကို မပြုပြင်နိုင်ဘူး ဆိုလို့ရှိရင် ကျနော်တို့တိုင်းပြည် ဒီမိုကရေစီရေး လမ်းကြောင်းပေါ်ကိုရောက်ဖို့အတွက် ဝေးကွာလိမ့်မယ်။ အမျိုးသားပြန်လည်သင့်မြတ်ရေး လမ်းကြောင်းပေါ်ကိုရောက်ဖို့ ဝေးကွာလိမ့်မယ်။ ဒါကြောင့် ၂၀၀၈ ဖွဲ့စည်းအုပ်ချုပ်ပုံ အခြေခံဥပဒေကို ပြုနိုင် ပြင်နိုင်ဖို့ ဖယ်ရှားနိုင်ဖို့ဆိုတဲ့ ကိစ္စတွေကို ကျနော်တို့ ညီအစ်ကိုမောင်နှမတွေနဲ့အတူ ကျနော်တို့ ရဲဘော်ရဲဘက်တွေနဲ့အတူ ဆက်လက်ပြီးတော့ ရုန်းကန်တိုက်ပွဲ ဝင်သွားမယ်ဆိုတာကို ဒီ ၂၃ နှစ်မြောက် ပါတီမွေးနေ့အခမ်းအနားမှာ ကျနော် ကတိပြုပြောကြားရင်း နှုတ်ခွန်းဆက်စကားကို နိဂုံးချုပ်ပါတယ်။ ကျေးဇူးတင်ပါတယ်။
No comments:
Post a Comment