ပြည်တွင်းပြောင်းလဲမှုနှင့် ကလင်တန်ခရီးစဉ်အပေါ် ပါတီဥက္ကဋ္ဌ ဦးအောင်မိုးဇော်၏အမြင်

ဒီတပတ် မြန်မာ့ဒီမိုကရေစီရေးရာ ဆွေးနွေးသုံးသပ်ခန်းမှာ ဦးစံမိုးဝေက ထိုင်း-မြန်မာနယ်စပ် အခြေစိုက် လူ့ဘောင်သစ်ဒီမိုကရက်တစ်ပါတီ ဥက္ကဋ္ဌ ဦးအောင်မိုးဇော်နဲ့ မြန်မာပြည်အတွင်း ပြုပြင်ပြောင်းလဲမှုများ အခြေအနေနဲ့ အမေရိကန်နိုင်ငံခြားရေးဝန်ကြီး ခရီးစဉ်အကြောင်းတို့ကို ဆွေးနွေးသုံးသပ် တင်ပြထားပါတယ်။

ဦးစံမိုးဝေ ။ ။ မကြာခင်ကပဲ အမေရိကန်နိုင်ငံခြားရေးဝန်ကြီး Mrs. Hillary Clinton ဟာ မြန်မာနိုင်ငံကို သုံးရက်ကြာ သွားရောက် လည်ပတ်ခဲ့ပါတယ်။ ဒါဟာ ရာစုနှစ် တဝက်ကျော်အတွင်း မြန်မာနိုင်ငံကို အမေရိကန် နိုင်ငံခြားရေး ဝန်ကြီးတစ်ဦးအနေနဲ့ သွားရောက်ခဲ့ခြင်း ဖြစ်ပါတယ်။ နိုင်ငံတကာ မီဒီယာတွေမှာ သမိုင်းဝင် ထူးခြားတဲ့ ခရီးစဉ်အဖြစ် ရှုမြင်သုံးသပ်ကြပါတယ်။ မြန်မာ့ဒီမိုကရေစီအရေးအတွက် တောက်လျှောက် တွန်းအားပေးနေတဲ့ အမေရိကန်နိုင်ငံရဲ့ နိုင်ငံခြားရေးဝန်ကြီး သွားရောက်လည်ပတ်လိုက်တာဟာ မြန်မာနိုင်ငံရဲ့ ပြောင်းလဲတိုးတက်မှုတွေဟာ တကယ်ပဲ အားရစရာတွေ ရှိနေပြီလား။ ပြည်ပမှာအခြေစိုက် လှုပ်ရှားနေတဲ့ လူ့ဘောင်သစ်ဒီမိုကရက်တစ်ပါတီရဲ့ ခေါင်းဆောင်လည်းဖြစ်၊ ၁၉၈၈ ခုနှစ်ကနေ မြန်မာ့နိုင်ငံရေးကို တစိုက်မတ်မတ် လုပ်ဆောင်နေခဲ့တဲ့ ဦးအောင်မိုးဇော်က သူ့ရဲ့ အမြင်ကို ဗွီအိုအေကို အခုလို ပြောဆိုပါတယ်။

ဦးအောင်မိုးဇော် ။ ။ အဲဒီ အခြေအနေအထိတော့ ယူဆလို့ မရသေးဘူး။ ကနေ့ အမေရိကန်ပြည်ထောင်စုရဲ့ နိုင်ငံခြားရေး ကြီး ဗမာပြည်သွားတယ်ဆိုတာကို ကျနော် နားလည်သလောက်ကတော့ ကျနော်တို့ တိုင်းပြည်ထဲမှာ အရွေ့တချို့၊ အပြောင်းအလဲတချို့၊ အပြုသဘောဆောင်တဲ့ အပြောင်းအလဲတချို့ စဖြစ်နေပြီ။ အဲဒီအပေါ်မှာ ပိုပြီးမြန်ဆန်အောင်လို့၊ နောက်ကိုပြန်ပြီးတော့ လှည့်မလာနိုင်တဲ့ ပြောင်းလဲမှုတွေ ဖြစ်ပေါ်လာအောင်လို့ သွားပြီး တိုက်တွန်းတဲ့သဘော။ အခြေအနေတွေကို ကိုယ်တိုင်ကိုယ်ကျသွားပြီး လေ့လာအကဲဖြတ်တဲ့ သဘောလို့ပဲ ကျနော် နားလည်ပါတယ်။

ဦးစံမိုးဝေ ။ ။ ပြီးခဲ့တဲ့ နောက်ဆုံး နိုင်ငံရေးအကျဉ်းသား ၂၀၀ လောက် လွှတ်ပေးတုန်းက မြန်မာနိုင်ငံဟာ ၂၀၁၄ အာဆီယံ ဥက္ကဋ္ဌ ရာထူးကို အဆိုပြုထားတဲ့အပေါ်မှာ အထောက်အကူဖြစ်အောင် လွှတ်ပေးတာလို့ သုံးသပ်ပြောဆိုမှုတွေ ရှိနေပါတယ်။ အဲဒီကိစ္စကလည်း အောင်မြင်သွားပြီ။ အခု ဝန်ကြီး ကလင်တန် ခရီးစဉ်မတိုင်ခင်မှာ နိုင်ငံရေးအကျဉ်းသားတွေ ထပ်လွှတ်ပေးမယ်ဆိုတဲ့ မျှော်လင့်မှုတွေလည်း ထွက်ပေါ်ခဲ့ ပါတယ်။ ဒါပေမယ့် အဲဒါဟာ ဖြစ်မလာခဲ့ဘူး။ အဲဒီတော့ မြန်မာအစိုးရဘက်က လုပ်ဆောင်မှုတွေက စိတ်ရင်းစေတနာအမှန်နဲ့ လုပ်နေတာမျိုး ဖြစ်နိုင်ပါ့မလား။

ဦးအောင်မိုးဇော် ။ ။ အကျဉ်းသားကိစ္စနဲ့ ပတ်သက်လို့ကတော့ အခုအချိန်အထိ ဒီနေ့ အုပ်ချုပ်နေတဲ့ပုဂ္ဂိုလ်တွေမှာ အပြောင်းအလဲဖြစ်လာတယ်လို့ ကျနော် မယူဆသေးဘူး။ ဘာကြောင့်လဲဆိုတဲ့အခါကျတော့ ကျနော်တို့ တိုင်းပြည်ထဲမှာ နိုင်ငံရေးအရ အကျဉ်းကျခံနေရတဲ့သူတွေရှိတယ်ဆိုတာတောင်မှ အခုအချိန်အထိ အသိအမှတ် မပြုသေးဘူးဖြစ်တယ်။ ဒီ Position က သူတို့ အာဆီယံဥက္ကဋ္ဌ ရာထူးမယူခင်က Position ဖြစ်တယ်။ အာဆီယံ ဥက္ကဋ္ဌ ရာထူးယူပြီးတော့လည်း ဒီ Position ကိုပဲ ဆက်ပြီး ကိုင်စွဲထားတုန်းပဲဖြစ်တယ်လို့ အဲဒီလို ယူဆတယ်။ ဆိုတဲ့အခါကျတော့ မှန်တယ် ဗမာပြည်ထဲမှာ အပြောင်းအလဲတချို့  အရွေ့တချို့ နှေးနှေးနဲ့ ဖြစ်ပေါ်နေတာ ရှိတယ်။ အင်မတန် နှေးကွေးစွာ ဖြစ်ပေါ်နေတာ ရှိတယ်။ တပြိုင်နက်တည်းမှာပဲ ခုနကလို အခြေခံကျတဲ့ နိုင်ငံရေးအကျဉ်းသားတွေကို နိုင်ငံရေး အကျဉ်းသားတွေအဖြစ် အသိအမှတ်ပြုရေးကိစ္စ၊ နိုင်ငံရေး အကျဉ်းသားတွေကို လွှတ်ပေးတဲ့ကိစ္စ အပါအဝင် တခြားသိသာထင်ရှားတဲ့၊ ခိုင်မာတဲ့၊ နောက်ကြောင်းပြန် မလှည့်နိုင်တဲ့ ပြောင်းလဲမှုမျိုး လုပ်တာကိုတော့ ကျနော်တော့ အခုအချိန်အထိ မတွေ့ရသေးဘူး။ အဲဒီအခါကျတော့ ယနေ့ စစ်ခေါင်းဆောင်တွေအနေနဲ့ လက်ရှိ အစိုးရအနေနဲ့ တိုင်းပြည်ကို တကယ်ပဲ စစ်စစ်မှန်မှန် အပြောင်းအလဲကို ဦးတည်ပြီးတော့ သွားဖို့ကြိုးစားနေတာလား။ ဒါမှမဟုတ်လို့ရှိရင် တစုံတရာ အချိန်ဆွဲနေတာလား။ သူတို့ မပြောင်းလဲဘဲနဲ့ သူတို့ရဲ့ နိုင်ငံတကာ ဆက်ဆံရေးတွေ အဆင်ပြေလာအောင်။ သူတို့လုပ်မယ့် လုပ်ငန်းတွေ အဆင်ပြေလာဖို့အတွက်ကို ကြိုးစားနေတာလားဆိုတဲ့ ကိစ္စတွေက အများကြီး စဉ်းစားစရာရှိတယ်။ ဝေဝါးနေဆဲဖြစ်တယ်။ ခိုင်ခိုင်မာမာပြောင်းလဲဖို့ လမ်းကြောင်းကိုရောက်နေပြီလို့ ပြောလို့မရသေးဘူး ဖြစ်တယ်။

ဦးစံမိုးဝေ ။ ။ ဒါဆိုရင် ဒေါ်အောင်ဆန်းစုကြည်နဲ့ တွေ့ဆုံစကားပြောဆိုမှုတွေ လုပ်တယ်။ အန်အယ်လ်ဒီ ပါတီကို ပြန်ပြီး မှတ်ပုံတင်နိုင်အောင်၊ ရွေးကောက်ပွဲဝင်နိုင်အောင် တံခါးဖွင့်ပေးတယ်။ တိုင်းရင်းသား လူမျိုးစုတွေနဲ့ ငြိမ်းချမ်းရေး ကမ်းလှမ်းတာတို့ ဘာတို့ရှိတယ်။ အဲဒါတွေကရော အရေးပါတဲ့ ပြောင်းလဲမှုတွေ မဟုတ်ဘူးလား။

ဦးအောင်မိုးဇော် ။ ။ ဒီ အပြောင်းအလဲတွေက အရေးမပါဘူးလို့ ဆိုလိုတာ မဟုတ်ပါဘူး။ ဒီ အပြောင်းအလဲတွေက လိုအပ်ပါတယ်။ ဒီ အပြောင်းအလဲတွေက ရှေ့ဆက်ပြီးတော့ တိုးတက်သွားဖို့။ ရှေ့ဆက်ပြီး တကယ် ကျယ်ကျယ်ပြန့်ပြန့် ဖြစ်သွားဖို့ အရမ်းလို အပ်တယ်။ အဲဒီအတွက်ကြောင့်လည်း အမေရိကန်ပြည်ထောင်စုရဲ့ နိုင်ငံခြားရေးဝန်ကြီးကိုယ်တိုင် ဗမာပြည်ကိုသွားတာ ဖြစ်တယ်။ ဒေါ်အောင်ဆန်းစုကြည်တို့ကိုယ်တိုင်က ခုနကလို အစရဲ့အစ ဗမာပြည်မှာ ဒီမိုကရေစီပြုပြင်ပြောင်းလဲမှုတွေ ဖြစ်နေဖို့အတွက် အစ ဖြစ်တယ်။ သမ္မတကြီးကို ယုံကြည်ပါတယ် စသဖြင့်ပေါ့ အပြောင်းအလဲတွေကို ပိုမြန်ဆန်နိုင်ဖို့အတွက်ကို ပြောဆိုနေကြတာတွေ ဆက်ဆံနေကြတာတွေ ဖြစ်နိုင်တယ်လို့ ကျနော်အနေနဲ့ အဲဒီလိုပဲ ယူဆတယ်။ ဒါပေမယ်လို့ ကနေ့ အပြောင်းအလဲတွေကနေ ရှေ့ကို မြန်မြန်ဆန်ဆန်ကြီး တိုးတက်သွားမယ် သို့မဟုတ် ကျယ်ကျယ်ပြန့်ပြန့်ကြီး ပြောင်းလဲသွားမယ်ဆိုတဲ့ ပြောင်းလဲသွားနိုင်တယ်ဆိုတဲ့ ခန့်မှန်းချက်မျိုးကတော့ အခုကာလမှာ ပေးဖို့က အရမ်းကို စောသေးတယ်လို့ ကျနော့်အနေနဲ့ ယူဆပါတယ်။

ဦးစံမိုးဝေ ။ ။ သမ္မတဦးသိန်းစိန်က မစ္စစ် ကလင်တန်နဲ့ စကားပြောတုန်းက သူ့ရဲ့ ပြောင်းလဲရေးလုပ်ငန်းတွေကို လုပ်ဆောင်တဲ့နေရာမှာ အစိုးရထဲမှာ လိုလားသူတွေလည်းရှိတယ်။ သံသယ ရှိနေသူတွေလည်း ရှိတယ်။ ဆန့်ကျင်နေသူတွေလည်း ရှိတယ်ဆိုပြီးတော့ ပွင့်ပွင့်လင်းလင်း ရှင်းပြခဲ့တယ်လို့ သိရတယ်။ အဲဒါနဲ့ ပတ်သက်တာကို ဘယ်လိုယူဆပါသလဲ။

ဦးအောင်မိုးဇော် ။ ။ အခု နိုင်ငံတော်သမ္မတဆိုတဲ့ ပုဂ္ဂိုလ်က အမေရိကန်ပြည်ထောင်စုရဲ့ နိုင်ငံခြားရေးဝန်ကြီးကို အဲဒီလိုပြောတဲ့ကိစ္စက ကျနော့်အနေနဲ့ကတော့ ပွင့်လင်းတယ်လို့ မယူဆဘူး။ သူကနေ့ လုပ်နေကိုင်နေတဲ့ကိစ္စတွေက အင်မတန် နှေးကွေးတဲ့အခါကျတော့ အဲဒီအပေါ်မှာ ခုနကလို ပြောဆိုလာမယ့်ကိစ္စကို ကြိုပြီးတော့ ကာတယ်လို့ပဲ ကျနော် ယူဆတယ်။

ဦးစံမိုးဝေ ။ ။ နောက်တစ်ခုက မြန်မာအစိုးရဟာ အမေရိကန်အပါအဝင် အနောက်နိုင်ငံတွေရဲ့ ပိတ်ဆို့အရေးယူမှုတွေကို ရုတ်သိမ်းပေးစေချင်တာ ထင်ရှားပါတယ်။ ဒီတော့ ဝန်ကြီး ကလင်တန်ပြောသွားတဲ့ ဒီလို ရုတ်သိမ်းပေးဖို့အတွက် မြင်ချင်တဲ့အရာတွေဖြစ်တဲ့ လူ့အခွင့်အရေးကိစ္စတွေ၊ ဒီမိုကရေစီရေး ပြုပြင်ပြောင်းလဲရေးတွေ၊ တိုင်းရင်းသားပဋိပက္ခတွေ ဖြေရှင်းဖို့ ဆိုတာတွေ အပါအဝင်။ မြောက်ကိုရီးယားနဲ့ စစ်ရေး အဆက်အသွယ်ဖြတ်ဖို့ စတာတွေ ပြောဆိုခဲ့ပါတယ်။ အဲဒီတော့ အဲဒီအရာတွေကို မြန်မြန်ဆန်ဆန် မြင်တွေ့နိုင်မယ်လို့ ယူဆနိုင်ပါသလား။

ဦးအောင်မိုးဇော် ။ ။ ကျနော် ဒီနေရာမှာ တစ်ခုပြောချင်တာက အမေရိကန်နိုင်ငံခြားရေး ဝန်ကြီး ပြောသွားတဲ့စကားထဲက တစ်ခုပြောချင်ပါတယ်။ တစ်ခုက ဘာလဲဆိုတော့ အမေရိကန်နိုင်ငံခြားရေးဝန်ကြီးက ကျနော်တို့ တိုင်းပြည်အတွက်ဆို အမေရိကန်ပြည်ထောင်စုနဲ့ ပြေလည်ရေး မပြေလည်ရေး၊ အခြားနိုင်ငံတွေနဲ့ ဆက်ဆံရေးကောင်းမွန်ရေး၊ မကောင်းမွန်ရေး ဆိုတာထက် ကျနော်တို့ တိုင်းပြည်ထဲက ပြည်သူတွေ ဂုဏ်သိက္ခာရှိရှိနဲ့ နောက် ပျော်ပျော်ရွှင်ရွှင်နဲ့ ရပ်တည်သွားနိုင်ဖို့က ပိုပြီးတော့ အဓိကကျတယ်လို့ သူပြောသွားတာကို ကျနော် အမှတ်တမဲ့ တွေ့လိုက်ရတယ်။ အဲဒီလိုဆိုတဲ့အခါကျတော့ ကနေ့ လက်ရှိအစိုးရအနေနဲ့ ကျနော်တို့ တိုင်းပြည်က ပြည်သူတွေ လွတ်လွတ်လပ်လပ် အခြေအနေတွေ ခံစားနိုင်ဖို့၊ လွတ်လပ်စွာ စီးပွားတွေ ရှာနိုင်ဖို့၊ ပျော်ပျော်ရွှင်ရွှင်ရှိနိုင်ဖို့ကိစ္စကို အမှန်တကယ် ဦးတည်မယ်။ ပြည်သူတွေ တကယ်လိုလားနေတဲ့ ငြိမ်းချမ်းရေးကို တကယ်တည်ဆောက်နိုင်မယ်။ ပြည်သူတွေ တကယ်လိုလားနေတဲ့ ခုနကလို ဒေါ်အောင်ဆန်းစုကြည်နဲ့ သင့်မြတ်ရေး၊ ဒေါ်အောင်ဆန်းစုကြည်နဲ့ ပူးပေါင်းဆောင်ရွက်ရေး။ ဒီကိစ္စတွေကို တကယ်ဆောင်ရွက်နိုင်မယ်။ ဒီမိုကရေစီလမ်းကြောင်းပေါ်ကို တကယ် ခိုင်ခိုင်မာမာ လျှောက်နိုင်မယ်ဆိုလို့ရှိရင် ခုနက Sanction ဆိုတဲ့ကိစ္စတွေက သူ့အလိုလို လျော့ပါးသွားမှာဖြစ်တယ်။ သူ့အလိုလို ရုတ်သိမ်းသွားမှာဖြစ်တယ်လို့ ကျနော့်အနေနဲ့ ပြောချင်ပါ တယ်။ ခုနက ကိုစံမိုးဝေ မေးတဲ့မေးခွန်းနဲ့ ပတ်သက်လို့ကတော့ ကျနော့် ခန့်မှန်းချက်၊ ယူဆချက်ကတော့ မြောက်ကိုရီးယားလို ကိစ္စမျိုးကို သူတို့ တစုံတရာ အပေးအယူ လုပ်နိုင်မယ့် အခြေအနေရှိတယ်လို့ ကျနော် ယူဆတယ်။ ပြည်တွင်းနိုင်ငံရေးကိစ္စတွေနဲ့ ပတ်သက်လို့ကတော့ အခုအချိန်အထိ နှေးကွေးနေတာ ကိုစံမိုးဝေတို့လည်း အသိဖြစ်ပါတယ်။ ကျနော်တို့က မြန်မြန်ထက်ထက် ဖြစ်စေချင်တယ်။ ပြောင်းမယ်ဆိုရင်လည်း ပြောင်းတာတွေက ခိုင်ခိုင်မာမာပြောင်းတဲ့ အပြောင်းအလဲတွေ ဖြစ်စေချင်တယ်လို့ ကျနော်ပြောချင်ပါတယ်။

ဦးစံမိုးဝေ ။ ။ နောက်ဆုံး သိချင်တာတစ်ခုကတော့ အခုဆိုရင် အမေရိကန်အစိုးရက မြန်မာအစိုးရနဲ့ တိုက်ရိုက်ဆက်သွယ် ပြောဆိုနေပြီ။ ဒေါ်အောင်ဆန်းစုကြည်နဲ့ အန်အယ်လ်ဒီ ပါတီကလည်း တရားဝင်ပါတီ အဖြစ်နဲ့ အစိုးရရဲ့ နိုင်ငံရေးဖြစ်စဉ် လမ်းကြောင်းပေါ် တက်တော့မယ်။ အခုအချိန်အခါမှာ ပြည်ပမှာ အခြေစိုက်တဲ့ မြန်မာ့ အတိုက်အခံ နိုင်ငံရေးအခန်းကဏ္ဍက ဘယ်လို လုပ်ကြမလဲ။ ဘာတွေ ဖြစ်လာမလဲလို့ ထင်ပါသလဲ။

ဦးအောင်မိုးဇော် ။ ။ ကျနော့်အထင်ကတော့ ကျနော်တို့ တိုက်ပွဲက မပြီးသေးဘူး။ ကျနော်တို့ တိုင်းပြည်ထဲမှာ ခုနကပြောသလို အပြောင်းအလဲဖြစ်နိုင်တဲ့ လက္ခဏာတချို့ရှိတယ်ဆိုပေမယ့် တောက်လျှောက်တင်ပြခဲ့သလိုပဲ အပြောင်းအလဲဆိုတာ အခိုင်အမာ ဖြစ်နေတဲ့ အနေအထား မဟုတ်ဘူးဆိုတဲ့အခါကျတော့ အခုတိုင်းပြည်ထဲမှာဖြစ်နေတဲ့ အရွေ့တွေကိုပေါ့ဗျာ ပိုပြီးမြန်ဆောင်သွားအောင်လို့၊ ပိုပြီးခိုင်မာသွားအောင်လို့ ကျနော်တို့ လုပ်ရမယ့်အလုပ်တွေ အများကြီးရှိသေးတယ်။ ကျနော်တို့ အဲဒီ အလုပ်တွေကို နိုင်ငံတကာကိစ္စတွေမှာပဲဖြစ်ဖြစ် ပြည်တွင်းကိစ္စတွေမှာပဲဖြစ်ဖြစ်၊ တိုင်းရင်းသားတွေနဲ့ ပူးပေါင်းဆောင်ရွက်တဲ့ ကိစ္စတွေမှာပဲဖြစ်ဖြစ် လုပ်စရာတွေ အများကြီးကျန်သေးတယ်။ အဲဒီ လုပ်စရာရှိတဲ့ အလုပ်တွေကို သေသေချာချာ ခိုင်ခိုင်မာမာ လုပ်သွားနိုင်ဖို့ လိုသေးတယ်။ ဒါမှလည်း တိုင်းပြည်အတွင်းမှာရှိတဲ့ ရွေ့နေတဲ့အရွေ့တွေက ပိုပြီးမြန်မြန်ဆန်ဆန် ဖြစ်လိမ့်မယ်။ ပိုပြီး ခိုင်ခိုင်မာမာ ဖြစ်လာလိမ့်မယ် လို့ ယူဆတယ်။ ဒါ တစ်ပိုင်းပေါ့။ နောက်တစ်ပိုင်းက ကျနော်တို့ ဒီလိုပဲ နယ်စပ်ဒေသတွေမှာပဲဖြစ်ဖြစ် နိုင်ငံတကာ မှာပဲဖြစ်ဖြစ် ကျနော်တို့ ရပ်တည် လှုပ်ရှားနေရတယ်ဆိုတာက ကျနော်တို့ တိုင်းပြည်အတွင်းမှာ အပြောင်းအလဲတွေ ဖြစ်ပေါ်စေချင်လို့။ အပြောင်းအလဲတွေ မြန်မြန်ဆန်ဆန် ဖြစ်ပေါ်အောင်လို့ ကျနော်တို့ ရပ်တည် လှုပ်ရှားနေကြတာ ဖြစ်တယ်။ ကျနော်တို့ တိုင်းပြည်ထဲမှာ အပြောင်းအလဲတွေ မြင်ရပြီဆိုလို့ရှိရင် ကျနော်တို့ ဝမ်းသာရမှာပေါ့။ ကြည်နူးရမှာပဲဖြစ်တယ်။ ဆိုတော့ ဒီနေရာမှာ ကျနော်တို့ အခန်းကဏ္ဍက ဘာလဲဆိုတဲ့ကိစ္စကတော့ ဖြေဖို့ခက်တယ်လို့ ထင်တယ်။ ကျနော်တို့ လုပ်နေတာတွေ၊ ရပ်တည်နေတာတွေ ကိုယ်နှိုက်က တိုင်းပြည်အတွင်းမှာ အပြောင်းအလဲဖြစ်ဖို့ဆိုတဲ့အခါကျတော့ တိုင်းပြည်အတွင်းမှာ အပြောင်းအလဲမြန်မြန်ဖြစ်လေ ကျနော်တို့အတွက် စိတ်အေးရလေ။ ကျနော်တို့အတွက် စိတ်ချမ်းသာရလေ ဖြစ်လိမ့်မယ်လို့ ကျနော်အနေနဲ့ အဲဒီလိုပဲ ယူဆပါတယ်။

ဦးစံမိုးဝေ ။ ။ လူ့ဘောင်သစ် ဒီမိုကရက်တစ်ပါတီရဲ့ ခေါင်းဆောင်၊ နှစ်ပေါင်း ၂၀ ကျော် အတိုက်အခံနိုင်ငံရေးမှာ ထဲထဲဝင်ဝင် လှုပ်ရှားခဲ့သူ ဦးအောင်မိုးဇော်နဲ့ ဆက်သွယ်မေးမြန်း ဆွေးနွေးခဲ့တာ ဖြစ်ပါတယ်။

-xxx-

၂၀၁၁ ခုနှစ် ဒီဇင်ဘာလ ၅ ရက်၊ မြန်မာ့ဒီမိုကရေစီရေးရာ ဆွေးနွေးခန်း